Insensittività
Minkejja ċ-ċokon tal-gżira Għawdxija, matul is-sena jsiru diversi attivitajiet li ta’ min jinkoraġġihom u jippromwovihom. Fil-fatt fi tmiem il-ġimgħa li għaddiet kien hemm attività li tittella’ kull sena miċ-Ċentru ta’ Għawdex tal-Moviment ta’ Kana. Dan l-appuntament annwali huwa sabiex jingħata l-Premju Qalb tad-Deheb. Ta’ kull sena l-Moviment ta’ Kana f’Għawdex jippremja familja li minkejja li tkun għaddejja minn diffikultajiet kbar minħabba mard jew ċirkostanzi sfortunati oħra, tirreaġixxi pożittivament għal dan il-għawġ u anke tkun ta’ xprun biex tinkoraġġixxi lill-ħaddieħor anki permezz ta’ ħidma fil-komunità.
Il-bord tal-għażla kull sena jirċievi diversi nominazzjonijiet mill-parroċċi, kunsilli lokali u għaqdiet u persuni oħrajn biex imbagħad minn fost dawn in-nominazzjonijiet tintagħżel dik il-familja li fl-opinjoni tal-bord tkun tissodisfa il-kriterji tal-għażla.
Din is-sena mess lill-familja Saliba li għandhom żewġ ulied b’diżabilità u li huma nvoluti attivament fil-volontarjat b’risq il-persuni b’diżabiltà f’Għawdex.
Avveniment bħal dan huwa mportanti ħafna għax jinkoraġġixxi lil dawk il-familji kollha li jkunu għaddejjin minn għawġ kbir u sfortunatament minn dawn il-familji għandna ħafna. Forsi ħafna minnhom ma nkunux nafu bihom għax iżommu kollox kwiet ġo l-erba’ ħitan ta’ djarhom però min hu bħali li l-ħidma tiegħi hija fost in-nies speċjalment f’mumenti ta’ diffikultà, nafu li r-realtà hija li f’Għawdex għandna familji bi problemi kbar.
Kemm ilni Kelliema għall-Familja iktar u iktar qiegħda nidħol sew fis-suġġett. Dispjaċir kbir li għandi huwa li minkejja li nafu li għandna familji bi problemi, l-għajnuna u s-servizzi mill-istat huma ftit li xejn. Fejn f’Malta għandek strutturi u servizzi speċjaliżżati fil-problemi familjari, aħna f’Għawdex għandna uffiċċju żgħir governattiv li bil-limitazzjoniet kbar li għandhom ma jistgħux ilaħħqu max-xogħol. Lanqas għandna post ta’ emerġenza li jista’ jilqa’ lil dawk kollha li jista’ jkollhom bżonn ta’ saqaf fuq rashom. Illum il-każijiet ta’ vjolenza domestika qegħdin jiżdiedu u anke qegħdin jiżdiedu l-każijiet ta’ minuri bi problemi li jkollhom mal-ġustizzja.
Minkejja li għaċ-ċerimonji bħal tas-Sibt li għadda jattendu għaliha ħafna rjus governattivi ta’ Għawdex, jiena niskanta kif dawn jibqgħu passivi quddiem il-bżonnijiet u ħtiġijiet tal-familji tagħna li jinsabu fil-bżonn. Jiena nħeġġeġ lill-Gvern sabiex ikun iktar sensittiv għall-ħtiġijiet tal-familji tagħna, in partikolari dawk li jinsabu f’diffikultà u pożizzjoni vulnerabbli. Billi l-pampaluni tal-Gvern jattendu għaċ-ċerimonji mhux se jsolvu l-problemi tan-nies fil-bżonn, imma billi jaqbdu l-barri minn qrunu u jinvestu fir-riżorsi u strutturi b’riżq il-familji Għawdxin
Nifraħ lill-Moviment ta’ Kana għal din l-inizjattiva u nawgura lill-familja Saliba għall-impenn tagħhom favur il-familja u l-persuni b’diżabiltà.
