Il-Kelliema Laburista għall-Familja u Ugwaljanza, id-deputata Justyne Caruana qalet li l-Partit Laburista ma jistax jibqa' passiv għall-ilmenti li saru dan l-aħħar dwar il-mod ta' kif qegħdin ikunu trattati l-klijenti ta' xi ċentri għal matul il-jum tal-persuni b'diżabiltà.
Il-klijenti taċ-ċentri, li huma l-persuni b'diżabbiltà, qegħdin jiġu trasportati mid-dar tagħhom għaċ-ċentru u lura f'vannijiet bla arja kkundizzjonata.
Dan qiegħed ikun kaġun ta' tbatija u nkonvenjent kbir għall-klijenti, li ħafna minnhom ikollhom kundizzjonijiet mediċi kumplessi ħafna.
Ta' min jgħid li għal dan is-servizz tat-trasport, il-Fondazzjoni qegħda tħallas eluf kbar ta' ewro minn flus il-poplu. Madankollu, minkejja dan, il-persuni b'diżabilità li qegħdin jinġarru b'dawn il-vannijiet qed jgħaddu minn din it-tbatija kollha minħabba n-nuqqas ta' arja kkundizzjonata fil-vetturi.
Minn meta nħolqot din il-Fondazzjoni, il-ħaddiema qegħdin iħossuhom demotivati ħafna minħabba l-mod u l-manjiera ta' kif qed jiġu trattati, b'konsegwenza ta' deċiżjonijiet li qegħdin jittieħdu mingħajr konsultazzjoni," qalet il-kelliema Laburista.
Filwaqt li l-Partit Laburista esprima s-solidarjetà tiegħu mal-ħaddiema ta' dawn iċ-ċentri, ħeġġeġ lill-Gvern u l-awtoritajiet kompetenti kollha biex jindirizzaw minnufih l-iskuntentizza li qiegħda tirrenja fost dawn il-ħaddiema.
Din l-iskuntentizza tista' twassal ukoll biex ħaddiema jikkunsidraw li jirriżenjaw minn dawn iċ-ċentri.
F'każ li dan jiġri, ikunu l-persuni bi bżonnijiet speċjali li sejrin ikunu affettwati l-iktar ħażin u allura l-Partit Laburista qed jinsisti li din hija kwestjoni li jistoqqilha attenzjoni mmedjata.
Il-Partit Laburista jappella lill-Gvern biex ma jibqax iktar passiv fuq il-kwestjonijiet relatati mal-mod ta' kif qegħdin jitmexxew dawn iċ-ċentri. Min-naħa tagħha Justyne Caruana saħqet li "l-persuni b'diżabiltà għandhom kull dritt għall-aħjar servizz u għal trattamet mill-iktar dinjituż."
