Qatt ma dħaqna b’ħadd
Xi ġranet ilu fuq xi ġurnal lokali xi ħadd għoġbu jikteb ittra dwar xi attività fis-Sannat, Għawdex fil-ġimgħa tal-festa li għaliha kellu jattendi s-sindku. Dan il-korrispondent kiteb li s-sindku ma attendiex u kkritika lis-sindku minħabba dan il-fatt. Għalkemm iddikjara jew iddikjarat li għandu jew għandha tendenzi Laburisti, dan jew din il-korrispondent\a ma qagħdx jew qagħditx lura mit-tifħir lill-uniku kunsillier Nazzjonalist f’din il-lokalità u allura dan il-fatt jixħet ċertu dubju dwar kemm din il-persuna tħaddanx ideali Laburisti jew le. U min irid jagħmel kritika serja ma joqgħodx jilgħab u jinħeba wara ċertu diskors.
Din l-ittra tatni spunt għax huma ħafna dawk il-qlub tajbin li joqogħdu jikkritikaw affarijiet banali u jieħdu kull okkażjoni biex jitfgħu t-tajn. Jien ma nafx kemm-il darba nkun mistiedna f’attivitajiet u mmur. Ħafna drabi min ikun jintroduċi ma jaranix jew inkella jindirizzani bħala
“membri parlamentari” meta ħliefi ma jkunx hemm. Imma ovvjament min kiteb l-ittra dwar is-Sindku ta’ Sannat dan mid-dehra ma jafux jew ma tafux.
Issa dwar ir-raħal ta’ Sannat hemm ħafna xi tgħid. Taħt tmexxija lokali Laburista, dejjem stinka u ħadem kemm felaħ għall-ġid tar-residenti u saru ħafna proġetti importanti mingħajr daqq ta’ trombi. Il-kuntatt mal-poplu dejjem kien wieħed kontinwu u dirett. Il-ħasra hi li għax appuntu dan ir-raħal għandu kunsill b’maġġoranza Laburista dejjem isib nuqqas ta’ kollaborazzjoni mill-Gvern ċentrali. Dan jikkuntrasta bil-kbir ma’ lokalitajiet b’maġġoranza Nazzjonalista għax dawn jieħdu kull għajnuna possibbli u fil-pront.
Però dawn huma tattiċi li wieħed irid joqgħod attent għalihom għax ir-residenti ta’ kull raħal ftit iqisu l-fatt li ħafna affarijiet ma jiddependux mill-kunsill imma mill-Gvern u l-mentalità hi li ġaladarba tiġri xi ħaġa fir-raħal, huwa l-kunsill li jrid jieħu ħsieb u jindirizza l-problema. Però l-kunsill ma jistax isolvi problema li taqa’ u huwa responsabbli minnha l-Gvern u mhux la kemm tfiehem lir-residenti dwar dan. L-istrateġisti Nazzjonalisti din jafuha sew u jużawha kontinwament biex il-poplu jgerger ma’ min ma għandux tort.
F’Ta’ Sannat per eżempju hemm il-problema tat-triq prinċipali malli tasal fir-raħal. Triq Sannat hija triq li tintuża ħafna u fiha hemm ukoll l-iskola li tinkludi fiha taqsima speċjali għat-tfal b’diżabilità. Ħafna ġenituri lmentaw miegħi li l-istat ta’ din it-triq huwa perikoluż ħafna għat-tfal speċjalment fil-ġranet meta tagħmel ix-xita. Anke l-anzjani residenti hemmhekk ilmentaw minħabba l-ħofor fondi li hemm u li qegħdin ikunu anke kaġun ta’ aċċidenti.
Ħafna appuntu lmentaw għax il-kunsill ma rranġax din it-triq u dan għax ma jirrealizzawx li din it-triq hija responsabbiltà tal-Gvern. Fil-fatt jien għamilt mistoqsijiet parlamentari lill-Ministru għal Għawdex għax toroq bħal din taqa’ taħt ir-responsabbiltà tal-Gvern. Fi twegiba li ngħatajt fl-14 ta’ Frar, 2005 il-Ministru kienet wieġbet li x-xogħol fuq din it-triq kellu jitlesta fl-2006 u mbagħad f‘mistoqsija oħra li għamilt fl-14 ta’ Mejju, 2007,il-Ministru qalet li x-xogħol kellu jitlesta fl-2007. Wasalna fl-aħħar kwart ta’ l-2008 u t-triq għadha fl-istat ta’ diżastru li kienet. It-tajba hija li filwaqt bħala strateġija jintuża l-kunsill, qabel l-elezzjoni kienu ħafna dawk il-kandidati Nazzjonalisti li wiegħdu li din it-triq ser issir. Imma bħal ħafna wegħdiet oħrajn din intesiet u qisha qatt ma kienet.
Aħna l-Laburisti forsi ma għandniex fama li nippożaw u nidhru. Però xogħolna għall-ġid tal-poplu dejjem għamilnih u bil-poplu ma dħakna u ma approfittajna qatt.
