Min kien fl-infern, hemm għadu
Lil din il-persuna ma nlumhiex u ġbidtilha l-attenzjoni li jien kull ħin u kull opportunità li jkolli, niġbed il-ħabel ta’ Għawdex u l-Għawdxin. Imma sfortunatament tiġbed kemm tiġbed huwa inutli jekk min għandu d-dmir li jwettaq ma jagħmel xejn.
Mhux l-ewwel darba li tkellimt dwar nuqqas ta’ servizzi li jeżistu f’Għawdex għalina l-Għawdxin - din hija realtà li nħabbtu wiċċna magħha ta’ kuljum. Hija nġustizzja kbira għax aħna taxxa bħall-Maltin inħallsu u allura għandu jkollna l-istess drittijiet u l-istess aċċess għas-servizzi.
Dan in-nuqqas mhux jien biss nitkellem dwaru imma hemm sensiela ta’ rapporti, anke minn kummissjonijiet tal-Gvern stess, li jgħidu iswed fuq l-abjad kemm Għawdex huwa fqir fis-servizzi u kemm hemm bżonn immedjat li s-sitwazzjoni tinbidel. Għar-rigward l-oqsma soċjali u sensittivi bħall-vjolenza domestika u d-drittijiet tat-tfal, isiru ħafna kampanji siewja imma l-kwistjoni hija waħda u kbira - il-vittmi Għawdxin fejn jistgħu jmorru biex jaħarbu mill-vjolenza li jkunu fiha? X’għajnuna u x’servizzi għandhom it-tfal li qegħdin jiġu mċaħħdin mit-tfulija tagħhom u mit-trobbija li tixraq lil kull tifel u tifla ta’ Għawdex?
Il-Kummissjoni dwar il-Vjolenza Domestika fir-rapport annwali tagħha bejn Marzu 2006 u Frar 2007, issemmi l-laqgħa li saret mal-Isqof Mario Grech u persuni oħrajn li jaħdmu f’dan il-qasam.
F’din il-laqgħa ġew diskussi diversi affarijiet, però ħareġ ċar il-fatt li hemm ħafna ostakoli biex issir ħidma f’dawn il-każijiet – il-Gvern ma għandu ebda dar għall-kenn għall-vittmi. Teżisti biss Dar Ġużeppa Debono li hija dar tal-Knisja u li minkejja li tagħmel xogħol siewi ħafna, tiddependi fuq il-volontarjat. Pjaga bħal din tinħtieġ servizz kontinwu u professjonali u allura l-Gvern irid jerfa’ l-piż u jipprovdi dawn is-servizzi.
Il-Kummissarju tat-Tfal fil-manifest għat-tfal tiddedika parti għal Għawdex. Dan għax anke l-Kummissarju għat-Tfal tħoss li f’Għawdex is-servizzi huma limitati ħafna. Dan il-manifest isemmi każijiet ta’ tfal li għandhom problemi ta’ mġieba jew li ma jistgħux jgħixu mal-familja tagħhom għal diversi raġunijiet.
Minħabba nuqqas ta’ servizzi professjonali u ta’ kura residenzjali, l-uniku post f’Għawdex li jista’ jilqa’ lil dawn it-tfal huwa l-isptar. X’sens jagħmel dan meta t-tfal li qegħdin nitkellmu dwarhom m’humiex morda imma minħabba li m’għandniex fejn inżommuhom, l-uniku post li jista’ jilqagħhom huwa l-isptar?!
Anke fejn jidħlu servizzi ta’ sapport li jinvolvi professjonisti dawn huma bbażati f’Malta fejn hemm l-aġenzija Appoġġ li tipprovdi sensiela ta’ servizzi għat-tfal u għall-familji. Minn dan Għawdex m’għandna kważi xejn għajr għal numru żgħir ta’ nies li jaħdmu fiċ-Ċentru għall-Ħarsien tal-Familja li minkejja n-nuqqas ta’ riżorsi qegħdin jagħmlu xogħol siewi ħafna.
Imma jista’ jkun li nkomplu sejrin hekk? Ftaħir nisimgħu ħafna min-naħa tal-Gvern imma minkejja dan jidher li l-Gvern lanqas mhu qed jisma’ dak li qed jgħidulu n-nies maħturin minnu stess. Sakemm tibqa’ din l-atitudni żgur li r-rabja fost in-nies bħal dik il-persuna li avviċinatni l-bieraħ se tikber u bir-raġun għax qabel l-elezzjoni dawn wiegħdu s-sema fl-art. Imma sfortunatament min kien fl-infern hemm għadu
